تاشقند : ازبکستان کے شہر تاشقند ایئرپورٹ کے قریب زور دار دھماکہ۔ دھماکے کے نتیجے میں متعدد افراد کے زخمی ہونے کی اطلاع ہے۔مقامی میڈیا کے حکام کے حوالے سے کہا کہ یہ واقعہ تاشقند کے بین الاقوامی ہوائی اڈے اسلام کریموف کے پاس ایک گودام میں پیش آیا۔ سوشل میڈیا پر گردش کرنے والی فوٹیج میں رات کے دوران آسمان میں آگ کے شعلے اور دھواں اٹھتا ہوا دیکھا جاسکتا ہے۔ہنگامی حالات کی وزارت نے کہا کہ دھماکے کی وجہ ابھی واضح نہیں ہے البتہ فائربریگیڈ عملے نے تیزی سے کارروائی کرتے ہوئے آگ پر قابو پالیا۔ازبک حکام کے مطابق آگ کے دائرے کو کم کیا جا رہا ہے۔ صورتحال مکمل طور پر قابو میں ہے۔ فائر سروسز اور امدادی ٹیم کے درجنوں اہلکار اور گاڑیاں گودام تک پہنچ چکی ہیں۔وزارت صحت کے مطابق دھماکے کے سبب اب تک کوئی بھی شدید طور پر زخمی نہیں ہے۔ ڈاکٹر تمام ضروری طبی امداد فراہم کر رہے ہیں۔